|
28. Jam ex hoc etiam tibi ipsi
occurrere multa non dubito, quae quamvis bona sint, et ad utile
aliquid instituta, non omnibus tamen habentibus sint utilia, sed
tantummodo bene utentibus. Nam cum eadem luce et sani oculi
perfunduntur et saucii, istis adjumentum est, illis tormentum. Idem
cibus alias valetudines alit, alias laedit: idem medicamentum hos
curat, illos debilitat: eadem arma alios muniunt, alios impediunt:
eadem vestis aliis tegumento est, aliis implicamento. Sic et
Baptismus aliis valet ad regnum, aliis ad judicium.
|
|
