|
11. Verba Epistolae: Solent sibi, inquit,
sola fama noti, cupere, aut incerto invicem aspectu verba miscere,
aut incogniti saltem non horrere praesentiam: tua vero censura, quod
absentem me inveneris, gratulatum te; quod autem redierim,
contristatum, litteris intimasti. Ad haec responsio: Non omnes qui
sibi sola fama noti sunt, videre invicem volunt, sed quos bene ipsa
fama commendat. Mirum est autem revera quod tibi accidit, ut tu eum
desiderandum dicas, a quo te persecutionem perpeti quereris: ille
autem qui te persequitur, absentem te malit esse, et nolit eum quem
persequitur, invenire. Sed hoc unde, nisi quia te potius eorum
persecutorem voluit intelligi, quorum in Christo salutem tua
praesentia credidit impediri?
|
|
