|
JUL. Ad reliqua festinat oratio: sed premendus adhuc locus
est, ut divisionibus quam possumus brevibus, lectori et intelligentia
rei et memoria suggeratur. In omnibus quidem pene rebus homonymorum,
quae aequivoca appellamus, conditio reperitur.
AUG. Promiseras te intelligentiam suggesturum esse lectori, et
loqueris de homonymis et aequivocis: quomodo ergo te ipsi saltem
Pelagiani intellecturi sunt, nisi prius ad scholas dialecticorum,
ubicumque terrarum potuerint inveniri, propter haec dicenda mittantur?
An forte et categorias Aristotelis, antequam tuos libros legant, eis
exponens ipse lecturus es? Cur non et hoc facias, homo
ingeniosissimus, quandoquidem a deceptis miseris pasceris otiosus?
|
|
