|
33. Nec audiendi Cathari negantes Ecclesiam posse omnia peccata
dimittere, et vetantes viduas nubere. Nec eos audiamus, qui negant
Ecclesiam Dei omnia peccata posse dimittere. Itaque miseri, dum in
Petro petram non intelligunt, et nolunt credere datas Ecclesiae
claves regni coelorum, ipsi eas de manibus amiserunt. Isti sunt qui
viduas, si nupserint, tanquam adulteras damnant, et super doctrinam
apostolicam se praedicant esse mundiores (I Tim. V, 14). Qui
nomen suum si vellent agnoscere, mundanos se potius, quam mundos
vocarent. Nolentes enim, si peccaverint, corrigi, nihil aliud
elegerunt, nisi cum hoc mundo damnari. Nam quibus veniam peccatorum
negant, non eos aliqua sanitate custodiunt, sed aegris subtrahunt
medicinam; et viduas suas uri cogunt, quas nubere non permittunt.
Non enim prudentiores habendi sunt, quam Paulus apostolus, qui
maluit eas nubere, quam uri (I Cor. VII, 9).
|
|
