|
Qui
conviciatur autem amico, dissolvit amicitiam. Ad amicum si produxerit
gladium, non desperes; si protulerit os triste, non timeas. Est
enim reversio ad amicum. Excepto convicio, et improperio, et
superbia, et mysterii revelatione, et plaga dolosa; in his omnibus
effugiet amicus (Eccli. XXII, 25-27).
Convicium quippe laedit famam, charitatem exstinguit. Tanta est enim
hominum malitia, ut quidquid ira instigante ab amico jaculatum fuerit
in amicum, quasi a secretorum suorum conscio, si non credatur, verum
tamen esse clametur: multi enim sicut propriis laudibus, ita in
aliorum vituperationibus delectantur. Quid scelestius improperio?
quod etiam falsa objectione innocentis faciem miserando rubore
perfundit. At superbia quid minus ferendum? quae solum id quod
fractae amicitiae subveniendum fuerat, humilitatis et confessionis
excludit remedium, reddens hominem audacem ad injuriam, tumidum ad
correptionem. Secretorum revelatio, qua nihil est turpius, nihil
exsecrabilius, nihil amoris vel gratiae relinquens inter amicos, sed
omnia replens amaritudine, et indignationis, et odii, atque doloris
felle cuncta aspergens. Salomon: Qui denudat arcana amici, perdit
fidem . Quid enim infelicius illo qui perdit fidem, et desperatione
languescit? Unde denudare amici arcana, desperatio est animae
infelicis (Id. XXVII, 17, 24). Plaga dolosa est occulta
detractio; plaga serpentis est et aspidis mortifera. Salomon: Si
mordeat serpens in silentio, nihil eo minus habet qui occulte detrahit
(Eccle. X, 11). Quemcumque in his vitiis assiduum inveneris,
cavendus tibi est ille. nec, donec sanetur, eligendus est.
Abjuremus convicia, quorum ultor est Deus. Semei David conviciis
impetens, a Salomone occisus est (III Reg. I, 44-46).
Infelix Nabal carmelus David servitutem et fugam improperans, a
Domino percuti meruit et occidi (I Reg. XXV, 38). Vitemus
et superbiam, et amici gratiam humilitatis beneficio praeveniamus .
Ob hanc causam populum, et urbes filiorum Ammon. gladius David et
ignis consumpsit (II Reg. X). Amicorum revelare secreta,
sacrilegium est, quo fides amittitur et animae captivatae desperatio
importatur: ut patet in Achitophel proditore (Id. XVI, 23).
Detrahere amico, venenum amicitiae putemus, quod Mariae sororis
Moysi corpus lepra foedavit, et ejecta est extra castra sex diebus
(Num. XII).
|
|
