CAPUT XIV. Instabilitatis oblentus solvitur.

Dissoluta vagatio dicit, Si Deum esse ubique credis, cur unum singulariter locum, quo fanta mala perpetrantur, custodis, et non potius ad alia transis? Sed stabilitas firma respondet, Si ita est ut asseris, quia ubique Deum esse fateris: ergo nec iste locus deserendus est, quem fugere appetis; quia et in ipso Deus est. At, inquis, meliorem inquiro, meliorem invenio. Sed respondeo: Numquid meliorem, aut etiam talem invenis, qualem diabolum et hominem perdidisse cognoscis? Memor esto itaque, quia primus angelus de coelo ruit, et primus homo de paradiso expulsus ad aerumnam hujus saeculi pervenit (Gen. III, 23). Attende quia Lot exercitio malorum probatus, inter Sodomitas sanctus fuit: in monte vero securitate torpens, ebriatus cum filiabus peccavit (Id. XIX). Quod videlicet vagationis taedium adhuc alteram speciem reddit, dum quosdam etiam in uno loco perseverantes a spiritualibus retrahens, vel terrenis negotiis implicare, vel rebus vilissimis satagit occupare: contra dicta Apostoli perpetraus, qui ait, Nemo militans Deo, implicat se negotiis saecularibus, ut ei placeat cui se probavit (II Tim. II, 4); et rursum, Sine intermissione orate, in omnibus gratias agite (I Thess. V, 17, 18).