|
Furtum et fraus quanquam gradus habeant locutionis, unum est tamen
quod dicunt. Furtum enim dicit, Si aliena non tollis, ex proprio
vel dives vel sufficiens esse non vales. Fraus dicit, Si cuncta quae
tibi praelatus servanda commisit, illibata consignas, et nec modicum
quid reservandum existimas; unde vel propriis utilitatibus consulis,
vel amicis et commilitonibus places? Sed innocentia ad utraque
respondet, Melius est pauperem et insufficientem esse, nullique ex
dato placere, quam aliquem laedere furto vel fraude: qui enim aliena
quolibet modo injuste praeripit, ipse sibi regni coelestis aditum
claudit. Unde et Praedicator egregius quosdam redarguit dicens,
Omnino delictum est in vobis, quod judicia habetis inter vos. Quare
non magis injuriam accipitis? quare non magis fraudem patimini? Sed
vos injuriam facitis, et fraudatis, et hoc fratribus. An nescitis
quia iniqui regnum Dei non possidebunt? Atque inter caetera
subjungit, Neque fures, neque rapaces regnum Dei possidebunt (I
Cor. VI, 7-10).
|
|
