|
Spiritualis fornicatio dicit, Numquid damnandum aliquid agit is, qui
in corde libidini consentit, et ad opus concupitae libidinis non
pertransit? Sed munditia cordis respondet, Omnino delinquit, qui
castimoniam animae non custodit. Unde et auctor munditiae in
Evangelio dicit, Qui viderit mulierem ad concupiscendum eam, jam
moechatus est eam in corde suo (Matth. V, 28). Quo contra per
beatum Job dicitur: Pepigi foedus cum oculis meis, ut ne cogitarem
quidem de virgine. Quam enim partem in me haberet Deus desuper, et
haereditatem Omnipotens de excelsis (Job XXXI, 1 et 2)?
Nisi enim auctori nostro cogitatio pravi consensus displiceret,
nequaquam per Isaiam diceret, Auferte malum cogitationum vestrarum ab
oculis meis (Isai. I, 16); et in Evangelio Pharisaeis, Quid
cogitatis mala in cordibus vestris (Matth. IX, 1)? Sed nec
Paulus apostolus diceret, Cogitationum, inter se invicem
accusantium, aut etiam defendentium, in die qua judicabit Deus
occulta hominum secundum evangelium meum (Rom. II, 15, 16).
|
|
