|
42. Illud etiam requirendum est, quomodo Joannes evangelista,
antequam Joannes Baptista missus esset in carcerem, dicit Jesum isse
in Galilaeam (Postea enim quam commemoravit, quod in Cana
Galilaeae fecit de aqua vinum, et descendit Capharnaum cum matre et
discipulis, et ibi manserunt non multis diebus, dicit eum deinde
ascendisse Jerosolymam propter Pascha; post haec venisse in Judaeam
terram et discipulos ejus, et illic demoratum cum eis et baptizantem:
ubi secutus ait, Erat autem et Joannes baptizans in Aenon juxta
Salim, quia aquae multae erant illic; et adveniebant, et
baptizabantur: nondum enim missus erat in carcerem Joannes [Joan.
II, 13, et III, 22-24]); Matthaeus autem dicat, Cum
autem audisset quod Joannes traditus esset, secessit in Galilaeam
(Matth. IV, 12). Similiter et Marcus: Posteaquam autem
traditus est, inquit, Joannes, venit Jesus in Galilaeam (Marc.
I, 14). Lucas etiam nihil quidem dicit de tradito Joanne, sed
tamen et ipse post baptismum et tentationem Christi dicit eum isse in
Galilaeam, sicut illi duo. Nam ita contexit narrationem suam: Et
consummata omni tentatione, diabolus recessit ab illo usque ad tempus.
Et regressus est Jesus in virtute Spiritus in Galilaeam, et fama
exiit per universam regionem de illo (Luc. IV, 13, 14).
Unde intelligitur hos tres evangelistas non Joanni evangelistae
contraria narrasse, sed praetermisisse primum Domini adventum in
Galilaeam posteaquam baptizatus est, quando illic aquam convertit in
vinum; tunc enim nondum erat traditus Joannes: eum vero adventum ejus
in Galilaeam connexuisse narrationibus suis, qui post Joannem
traditum factus est; de quo ejus reditu in Galilaeam ipse Joannes
evangelista sic loquitur: Ut ergo cognovit Jesus quia audierunt
Pharisaei quia Jesus plures discipulos facit et baptizat quam Joannes
(quanquam Jesus non baptizaret, sed discipuli ejus), reliquit
Judaeam, et abiit iterum in Galilaeam (Joan. IV, 1-3).
Tunc ergo intelligimus jam fuisse traditum Joannem, Judaeos vero
audisse quod plures discipulos faceret et baptizaret, quam fecerat et
baptizaverat Joannes.
|
|
