|
80. Sequitur Matthaeus: In illo tempore respondens Jesus dixit:
Confiteor tibi, Pater, Domine coeli et terrae, quia abscondisti
haec a sapientibus et prudentibus, etc., usque ad illud ubi ait,
Jugum enim meum suave est, et onus meum leve (Matth. XI,
25-30). Hujus loci et Lucas meminit, sed ex parte. Non dicit
enim ipse, Venite ad me, omnes qui laboratis, et alia quae
sequuntur. Semel autem hoc dictum a Domino, sed Lucam non totum
quod dictum est commemorasse, credibile est. Matthaeus enim dicit,
In illo tempore respondens Jesus dixit, posteaquam exprobravit
civitatibus: Lucas autem post illam exprobrationem civitatum
interponit quaedam, non tamen multa; atque hoc ita subjungit, In
ipsa hora exsultavit Spiritu sancto, et dixit (Luc. X, 21).
Unde etiam si Matthaeus non In illo tempore diceret, sed In ipsa
hora, tam pauca interponit Lucas in medio, ut etiam eadem hora dictum
non absurde videatur.
|
|
