|
106. Sequitur Matthaeus, et dicit: Et dimissa turba ascendit in
naviculam et venit in fines Magedan, etc. usque ad illud ubi ait,
Generatio mala et adultera signum quaerit, et signum non dabitur ei,
nisi signum Jonae prophetae (Matth. XV, 39; XVI, 4).
Hoc jam et alibi dixit idem Matthaeus (Id. XII, 39). Unde
etiam atque etiam retinendum est, saepius Dominum eadem dixisse; ut
quod existente contrario solvi non potuerit, bis dictum intelligatur.
Hunc sane ordinem etiam Marcus tenens, post illud de septem panibus
miraculum, hoc idem subjicit quod Matthaeus, nisi quod Dalmanutha,
quod in quibusdam codicibus legitur, non dixit Matthaeus, sed
Magedan (Marc. VIII, 10-12). Non autem dubitandum est
eumdem locum esse sub utroque nomine. Nam plerique codices non habent
etiam secundum Marcum, nisi Magedan. Nec illud moveat, quod
Marcus non dicit responsum esse quaerentibus signum de coelo, idem
quod Matthaeus de Jona, sed ait Dominum respondisse, Signum non
dabitur ei. Intelligendum est enim quale petebant, hoc est, de
coelo: praetermisit autem dicere de Jona, quod Matthaeus
commemoravit.
|
|
