CAPUT LX. Ubi de ore piscis solvit tributum, quod Matthaeus solus dicit.

118. Sequitur Matthaeus, dicens: Et cum venissent Capharnaum, accesserunt qui didrachma accipiebant, ad Petrum, et dixerunt ei: Magister vester non solvit didrachma? Ait, Etiam, etc., usque ad illud ubi ait, Invenies staterem; illum sumens da eis pro me et te (Matth. XVII, 23-26). Hoc solus iste commemorat, quo interposito eumdem ordinem sequitur, in quo cum eo etiam Marcus et Lucas pariter ambulant.