|
119. Sequitur ergo idem Matthaeus, et dicit: In illa hora
accesserunt discipuli ad Jesum dicentes: Quis, putas, major est in
regno coelorum? Et advocans Jesus parvulum, statuit eum in medio
eorum, et dixit: Amen dico vobis, nisi conversi fueritis, et
efficiamini sicut parvuli, non intrabitis in regnum coelorum, usque ad
illud ubi ait, Sic et Pater meus coelestis faciet vobis, si non
remiseritis unusquisque fratri suo de cordibus vestris (Matth.
XVIII). Ex isto aliquanto prolixiore Domini sermone non omnia,
sed quaedam Marcus eumdem sequens ordinem posuit; quaedam etiam ipse,
quae Matthaeus non dicit, inseruit (Marc. IX, 33-49).
Totus autem sermo quousque eum considerandum suscepimus, a Petro solo
interpellatur, quaerente quoties fratri debeat ignosci. Talia enim
Dominus loquebatur, ut satis eluceat, etiam hoc quod Petrus
interrogavit, eique responsum est, ad eumdem pertinere sermonem.
Lucas autem, nisi illud de parvulo quem constituit ante discipulos
imitandum, cum de sua magnitudine cogitarent, nihil hoc ordine servato
commemorat (Luc. IX, 46-48). Si qua enim alia similiter
dixit, quae et in isto sermone sunt posita, alibi et ex aliis
occasionibus dicta recoluit: sicut Joannes de remissione peccatorum,
quod tenebuntur, si cui tenuerint; et dimittentur, si cui
dimiserint, post resurrectionem a Domino dictum commemorat (Joan.
XX, 23); cum Matthaeus in hoc sermone Dominum hoc dixisse
meminerit, quod et Petro antea dictum fuisse idem ipse testatur
(Matth. XVI, 19). Eadem itaque saepe ac pluribus locis
Jesum dixisse, necubi moveamur, si ordo dictorum quibusdam repugnare
putabitur, sicut jam toties commendavimus, meminisse debemus, ne hoc
semper admonere necesse sit.
|
|
