CAPUT XI. De potu quem dederunt ei priusquam commemorata esset ejus crucifixio, quomodo conveniat inter Matthaeum et Marcum.

38. Sequitur itaque Matthaeus: Et venerunt, inquit, in locum qui dicitur Golgotha, quod est Calvariae locus: de hoc loco apertissime consentiunt. Deinde adjungit idem Matthaeus: Et dederunt ei vinum bibere cum felle mixtum, et cum gustasset, noluit bibere (Matth. XXVII, 33, 34). Hoc Marcus ita narrat: Et dabant ei bibere vinum myrrhatum; et non accepit (Marc. XV, 23). Hoc intelligendum est Matthaeum dixisse, cum felle mixtum: fel quippe pro amaritudine posuit; myrrhatum enim vinum amarissimum est: quanquam fieri possit ut et fel et myrrha vinum amarissimum redderent. Quod ergo ait Marcus, non accepit; intelligitur, non accepit ut biberet. Gustavit autem, sicut Matthaeus testis est; ut quod idem Matthaeus ait, noluit bibere, hoc Marcus dixerit, non accepit; tacuerit autem quod gustaverit.