|
Liber de Diligendo Deo pius est, judicio Erasmi ac Theologorum
Lovaniensium, nec ineruditus: sed subdititius tamen, vel ipsa ex
phrasi plurimum discrepante ab Augustiniana, merito iisdem visus.
Auctor certe se ipse aetatis recentioris esse satis eo prodit, quod
Hieronymi dictum ex lib. 3 in Matth. XVIII citat in hunc
modum: Unde quidam sanctus ait, Magna dignitas animarum, etc.
Contulit huc sententias ad inflammandam dilectionem Dei, variis ex
libris, Hugonis Victorini in primis, Bernardi et Anselmi. Et
quidem a capite 4 ad 11, nihil nobis legendum aliud praebet, quam
quod verbis iisdem ac fere totidem scripsit Hugo in Soliloquio de
Arrha animae. Alia itidem sunt ex aliis Hugonis opusculis excerpta
loca, plura etiam ex diversis Bernardi Concionibus, et quaedam ex
Meditatione apud Anselmum postremae editionis decima sexta, quae nos
passim positis notis e regione monstramus . Ad extremum, capite 18
exhibetur insignis locus Anselmi ex ipsius Proslogio. Sapit hoc opus
eumdem auctorem ac liber de Spiritu et Anima. Nec forte alteri
melius adscripseris Manuale, et alia quaedam opuscula quae hic postea
repraesentantur, itemque libros apud Hugonem de Anima primum et
tertium, qui apud Bernardum Meditationes et de Conscientia
nuncupantur. Caeterum Vincentius Bellovacensis, lib. 23 Speculi
naturalis, cap. 1, nonnihil quod legere est cap. 3 hujus libri,
citat nomine Petri Comestoris. Librum contulimus cum Mss. Regiis
duobus in quibus Augustini nomine falso praenotatur.
|
|
