|
Liquet non esse Augustini, tametsi in codicibus bene multis ipsi
ascribatur, et ipsius nomine citetur a Magistro Sententiarum, lib.
2, dist. 35, cap. Quocirca; lib. 3, dist. 1, cap.
Diligenter; et lib. 4, dist. 12, cap. Institutum.
Trithemius Alcuino assignat in lib. de Scriptoribus Eccles. et in
lib. 2 de Viris illustr. ord. S. B., cap. 26. Eidem
Joannes Baleus, Centuria 2 Scriptorum Britanniae. Patero
episcopo Gratianus, de Consecrat. dist. 2, cap. 13. Gennadio
Algerus, lib. 1 de Corpore et Sanguine Domini, cap. 22; et
S. Thomas, quodlib. 12, art. 11, et in Catena ad primum
caput Matthaei: ipse quoque Magister Sent. in lib. 2, dist.
8, editionis Lovaniensis; et alii plures, quibus manuscripti quidam
suffragantur: inter eos unus e Colbertinis optimae notae in fronte
libri habet: Incipit liber Ecclesiasticorum Dogmatum Gennadii; et
in fine, Explicit definitio Ecclesiasticorum Dogmatum Gennadii.
Ratramnus Corbeiensis monachus, in lib. 3 contra opposita
Graecorum, cap. 5: Gennadius, ait, Constantinopolitanus
episcopus vir multa lectione antiquorum peritus, in libro
Ecclesiasticorum Dogmatum de Spiritus sancti processione sic
loquitur. Graecum sane scriptorem redolent verba nonnulla; exempli
gratia, quae cap. 14 leguntur, et aliqui Latinorum praesumptores
affirmant. Attamen Gennadii Massiliensis nomine ab aliis laudatur,
scilicet a Platina in Symmacho, ubi episcopum eum perperam appellat,
a Valafrido Strabone in lib. de Rebus Ecclesiasticis, cap. 20,
in haec verba: Gennadius Massiliensis presbyter in Dogmate
Ecclesiastico, etc. Fausto tribuit codex Padolironensis hacce
inscriptione: Incipiunt definitiones Dogmatum Ecclesiasticorum
Fausti episcopi Ecclesiae Maxiliensis; ex Itinere Italico
litterario ad 24 maii 1686, pag. 208. In antiquissimo
omnium codice Colbertino ante annos fere nongentos scripto, exstat
sine auctoris nomine sub hocce titulo: Incipit dogma sanctorum Patrum
trecentorum et octo episcoporum congregatis (f. congregatorum) apud
Niceam. Tum capiti primo haec praefiguntur: In Patre unitas, in
Filio aequalitas, in Spiritu sancto unitas aequalitasque
substantiae; et haec tria unum propter Patrem, aequalia propter
Filium, connexa propter Spiritum sanctum. Credimus unum esse Deum
Patrem, et caetera deinceps, ut in aliis Mss., nisi quod in eo et
melior est capitulorum ordo, collocatis continenter omnibus quae
spectant ad Baptisma, ad Eucharistiam et Poenitentiam; et auctior
est liber, addito ibidem capitulo de Baptismate et capitulo de
Poenitentia, praeter alia quaedam de aliis rebus in libri fine.
Porro post caput 21, ea quae in editis sequebantur usque ad cap. de
Baptismate nunc 22, absunt ab omnibus manuscriptis, fuerantque
contra superiorum capitulorum errores quosdam huc translata ex
Coelestini epistola ad Galliae episcopos, ex Concilio Carthaginensi
contra Pelagianos, et ex Arausicano secundo, quae omnia sinceriora
in fine tomi decimi habes. Haec itaque capitula numero triginta,
necnon alia tria ante caput nunc 30 contra manuscriptorum fidem
interjecta sustulimus. Sed veteres codices non omnes ad cap. nostrum
55 desinunt, addunturque alia et alia in diversis codicibus
capitula.
Juvat hic demum annectere Lovaniensium Theologorum censuram. Liber
hic, inquiunt, non est catholici scriptoris, sed Gennadii
Massiliensis in Gallia presbyteri . . . . . . . . . de
factione Gallorum, contra quam scribunt Prosper et Hilarius
Augustino, et contra quam congregatum fuit concilium Arausicanum
secundum. Porro, ut saepius in catalogo Virorum illustrium graves
habet errores; sic et in his Dogmatibus Ecclesiasticis quaedam habet
a lectore cavenda. Sane hic auctor nusquam in hoc libro meminit
peccati originalis, aut baptismatis infantium in remissionem
peccatorum: cumque multos nominet haereticos, nusquam meminit Pelagii
aut catholici dogmatis contra eum prolati; sed contra, diligenter
inculcat animas non esse ex traduce, eo quod sciret Pelagium inde suum
dogma statuere.
|
|
