|
Liber de Fide ad Petrum inter Augustini opera olim impressus est
veterum aliquot manuscriptorum auctoritate, qui ei assignant. Verum
non esse Augustini probe monstravit Erasmus ex ipsa phrasi aliisque
argumentis, quae hic referre superfluum putamus. Nam indubitatus ejus
auctor a nemine jam ignoratur Fulgentius. Huic certe asserit
scriptura antiquissima codicis Corbeiensis ante mille annos exarati,
quae ad operis calcem exhibetur in haec verba: Fulgentii episcopi
sanctae Ecclesiae catholicae Ruspensis de Regula verae fidei liber
explicit. Neque contemnendus, quanquam altera et posteriore manu
ibidem additus in fronte operis titulus: Epistola Fulgentii episcopi
de Fide catholica. Praeterea sub Fulgentii nomine citatur a
Ratramno, in libro de Corpore et Sanguine Domini. Isidorus etiam
in Catalogo, et Honorius Augustodunensis in Chronicis testantur
Fulgentium scripsisse Regulam verae fidei: et eam Regulam ab eodem
Fulgentio petit Ferrandus diaconus, in epistola inter Fulgentianas
novae editionis decima tertia. Inscribebatur olim: De Fide ad
Petrum diaconum. Sed Petrum hunc alium a Petro diacono cui scriptus
est Fulgentii de Incarnatione liber, facile credimus, ob rationes
allatas in nova Fulgentii editione, quae Parisiis ex officina
Guillelmi Desprez jam nunc prodit, studio et labore eruditi viri
Lucae Mangeant Clerici Parisiensis recognita, aucta et castigata.
Nec injuria expunctum e titulo est diaconi nomen; quando hunc in
exordio Fulgentius Petrum filium vocat, non, uti diaconos compellare
solet, fratrem aut condiaconum. Recognovimus hoc opus ad Mss.
Romanos bibliothecae Vaticanae quatuor, ad Anglicanos duos, ad
vetustissimum Corbeiensem, ad Sorbonicum, Victorinum, Beccensem,
et alios quosdam. In Corbeiensi et aliis melioris notae Mss.
desinit in fine capitis 44; neque caput 45, quod diverso stilo et
ad virum militarem scriptum est, in eis usquam reperitur.
|
|
