|
8. Fallax mentis de se ipsa existimatio. Errat autem mens, cum se
istis imaginibus tanto amore conjungit, ut etiam se esse aliquid
hujusmodi existimet. Ita enim conformatur eis quodam modo, non id
existendo, sed putando: non quo se imaginem putet; sed omnino illud
ipsum cujus imaginem secum habet. Viget quippe in ea judicium
discernendi corpus quod foris relinquit, ab imagine quam de illo secum
gerit: nisi cum ita exprimuntur eaedem imagines tanquam foris
sentiantur, non intus cogitentur, sicut dormientibus, aut
furentibus, aut in aliqua ecstasi accidere solet.
|
|
