|
Exstat iste liber in vetustissimis exemplaribus sub titulo Orosii
percontantis et Augustini respondentis. Verumtamen, ut praefationis
et interrogationum stilus dissidet ab Orosiana phrasi; ita reliquus
sermo non convenit Augustino, nisi cum ipsius verba recitantur.
Congestae huc sunt quaestiones ex variis locis. Nam duodecim priores
sunt in opusculo de Trinitate et unitate Dei, quod inter subdititios
libros tomi 8 exhibetur. Aliae ex subsequentibus plures pertinent ad
Commentarios in Genesim, Eucherii nomine vulgatos. Non paucae
etiam ex Augustini libris de Genesi ad Litteram decerptae sunt. Ad
extremum, dialogus clauditur sententia Augustini citati in haec
verba: Nam de eo qui praeesse festinat, quidam Patrum eleganter
expressit dicens, Sciat se non esse episcopum, qui praeesse cupit,
non prodesse. Locus est libri 19 de Civitate Dei, cap. 19:
Intelligat non se esse episcopum, qui praeesse dilexerit, non
prodesse. Opus recognovimus ad Corbeiensem codicem ante annos fere
octingentos scriptum, ad Vindocinensem et Michaelinum annos habentes
ad minus sexcentos, ad Romanos bibliothecae Vaticanae quatuor; et ad
editiones antiquiores. In Corbeiensi et Michaelino praenotatur sic,
Quaestiones Orosii et responsiones sancti Augustini episcopi; in uno
e Romanis, Liber Dialogorum beati Augustini episcopi, percontante
Orosio presbytero; nec multo aliter aliis in libris inscribitur.
|
|
