|
Locum hic suum, quem ex instituto per nos ordine initio Appendicis
postulat, non totum occupabit opus illud, quod Hieronymus Vignierius
in partem Supplementi primam transtulerat, hoc titulo praenotatum:
|
“Tractatus de septem Vitiis et septem Donis Spiritus sancti:”
|
|
incipiens,
|
“Septem sunt vitia principalia.”
|
|
Id a Vignierio
repertum est inter sanctorum patrum monimenta impressa Parisiis, anno
1634, cura Guillelmi Camerarii, Scoti, et congregatione
Oratorii presbyteri, qui Augustino, non ab antiquis codicibus, sed
tantum a multis viris doctis tribui dicit. Verum habetur hoc ipsum
apud Hugonem Victorinum in libro Allegoriarum in Matthaeum secundo,
cap. 3. Eidem Allegoriarum libro, cap. 19, insertum etiam est
opusculum aliud de Donis Spiritus sancti, hoc exordio:
|
“Scriptum
est, Si enim vos cum sitis mali,”
|
|
etc., quod ejusdem Camerarii
auctoritate, pro Augustini Sermone dederat Vignierius in eadem
Supplementi parte, non longe ante dictum tractatum de septem Vitiis.
Huic porro tractatui conjunctum recte esset istud opusculum, quod et
summam habet cum illo affinitatem, et confert nonnihil ad ejus
integritatem. Opusculo enim sejuncto imperfectus videtur tractatus,
aut titulo saltem per Vignierium praefixo, qua parte de Donis
Spiritus sancti inscribitur, haudquaquam respondens. Caeterum aptior
est apud Hugonem inscriptio tractatus in hunc modum:
|
“De septem
Peccatis mortalibus, contra quae valent orationis dominicae
petitiones:”
|
|
cum nihil aliud sit nisi quaedam dominicae orationis
septemque ejus petitionum adversus septem vitia expositio. Hugoni
porro suus ille tractatus maneat, multis, si res posceret, argumentis
ipsi asserendus. Confer, si lubet, librum ipsius 2 de
Sacramentis, part. 13, cap. 1, et Summae sententiarum
tractatum 3, cap. 16, ubi eadem plane ratione septem vitia
descripta reperies. Iisdem quoque verbis hic definitum in genere
vitium, atque in libro ejus Miscellaneorum primo. Quid sit Dei
nomen, expositum non secus ac in alio tractatu Hugonis super
Magnificat: et de captanda Dei benevolentia initio precationis
similia cum hoc libello habet tractatus ejusdem de Modo orandi.
Postremo tractatus, quem scripsit de quinque Septenis, sive
Septenariis, editus in citato libro 2 Allegoriarum, cap. 15,
auctorem plane eumdem cum tractatu de septem Vitiis refert.
|
|
