|
O felix jucunditas, et jucunda felicitas, sanctos videre, cum
sanctis esse, et esse sanctum; Deum videre, et Deum habere in
aeternum et ultra! Haec sedula mente cogitemus, haec toto cordis
desiderio desideremus, ut ad eos cito pervenire valeamus. Si quaeras
quomodo istud potest fieri, vel quibus modis, quibus meritis,
quibusve auxiliis; audi: res ista posita est in potestate facientis,
quoniam regnum coelorum vim patitur (Matth. XI, 12). Regnum
coelorum, o homo, non aliud quaerit pretium nisi te ipsum: tanti
valet quantum es; te da, et habebis illud. Quid turbaris de pretio?
Christus semetipsum tradidit, ut acquireret te regnum Deo Patri:
ita tu temetipsum da, ut sis regnum ejus, ac non regnet peccatum in
tuo mortali corpore, sed spiritus in acquisitione vitae.
|
|
