|
Habes praefixum superiori libro elenchum duplicem: unum quo illa
praecedentium centum viginti septem Quaestionum exhibetur collectio,
quae ab Augustino Ratisponensi, ab Joanne Amerbachio et a
Desiderio Erasmo fuit primum vulgata; alterum, qui collectionem non
tantum disparem Quaestionum ordine, sed etiam earum numero auctiorem
longe repraesentat. Hujus porro alterius collectionis exemplar cum e
Victorina Bibliotheca adeptus fuisset Jacobus Haemer, curavit ut
subsequentes hic Quaestiones, quas videlicet aut nondum vulgatas, aut
certe aliis verbis tractatas esse animadvertebat, prodirent in lucem.
Fecit vero ipse tres earum classes, quarum prima in editis
inscribitur, Quaestionum ex Veteri Testamento pars secunda; aliae
similiter, Quaestionum sive ex Novo Testamento, sive ex utroque
mixtim, pars secunda dici solent: cum tamen Victorinus codex aliique
inspecti a nobis Mss., in una et altera classe Quaestiones omnes,
nec alia quam in excuso superius elencho cernitur, ratione et ordine
digestas complectantur. Nihil nos in constituta per Haemereum,
perque posteriores editiones jam confirmata distributione mutandum
duximus: nisi quod aliquod inde Quaestiones transferre visum est in
superiorem librum collectionis primo vulgatae; ut quae de eodem
argumento agunt, juxta se collocatis, quid inter illas intercedat
varietatis primo conspectu deprehendas; tum etiam utra collectio in
Mss. antiquior et sincerior sit, vel potius an utraque interpolatoris
inepti manum referat, dijudicare possis. Caeterum de subsequenti
opere idem quod de priore sentiri volunt Lovanienses Theologi: quod
varia, inquiunt, contineat et Augustino indigna, et a veritate
aliena.
|
|
