QUAESTIO LV

Cur apostolus Paulus Petrum coapostolum suum reprehendit, quod timens eos qui erant ex circumcisione, subtrahebat se a Gentilibus (Galat. II, 11, 14), cum et ipse timens eos qui erant ex circumcisione, accipiens circumcidit Timotheum, quod fieri prohibebat (Act. XVI, 3)? et ipse ergo reprehendendus est?

Incredibile est tantum apostolum in eo alterum reprehendisse, in quo se sciret succubuisse. Hoc a tam magno viro factum, non est fas credere; quia iis competit qui carnaliter vivunt. Caret itaque apostoli Pauli factum reprehensione. Cum enim praedicaret non circumcidi, volens autem Timotheum secum assumere, qui cum esset natus matre Judaea, patre autem Graeco, et hoc Judaeis esset scandalum, ut ex Judaea natum incircumcisum assumeret; tunc subjectioni se submisit ad horam, et accipiens circumcidit eum. Rem ergo superfluam fecit, permittente eo qui passus est. Quia enim erat ex matre Judaea, eruditus ab infantia in synagoga litteris sacris, id est voluminibus Hebraeorum, permisit circumcidi se, ut Judaeis scandalum tolleret, quia zelum habebant generis sui. Denique cum Titus, inquit, esset Graecus, non est compulsus circumcidi (Galat. II, 3). Timotheum autem, quia de matre Judaea erat, sicut dixi, non sunt passi Judaei assumi inter doctores incircumcisum. Ad hoc illum assumpsit Apostolus, ut eum episcopum ordinaret, sicut fecit. Eruditus enim propheticis Litteris, ad asserendum Christum idoneus magister inventus est. Apostolus enim Petrus non esset reprehensus, si se more Judaeorum a Gentilibus segregasset, ne illis scandalo esset. Sed hoc reprehensum est in apostolo Petro, quod cum ante Graecis credentibus gentiliter viveret, advenientibus ab Jacobo Judaeis, timore subjectus ex Gentilibus credentibus judaizare debere docebat. Hinc audit, Si tu, cum sis Judaeus, gentiliter vivis, quomodo cogis Gentes judaizare? Dubitari enim fecerat de evangelica disciplina: quod crimen est, dum quae aedificaverat, destruebat. Ideo simulationem hanc vocat apostolus Paulus, quem constat si circumcidisset Timotheum, ut non taceret rem se superfluam propter illorum scandalum facere, et ideo se cedere, propter quod matrem haberet Judaeam: nec enim Judaei insisterent, nisi inventa occasione matris Judaeae, quia hoc minime possent improbare Gentilibus, nec habere facile de his scandalum, qui non essent de genere Israel. Non ergo simulatione hoc fecit, sed violentia. Supra dicta enim causa simulationem habuit non minimam. Nam multi reprehensi sunt in hac causa, ita ut aliqui Judaeorum et Barnabas consentirent huic simulationi.