QUAESTIO LXII

Si in Christo omnes thesauri sapientiae et scientiae sunt absconditi (Coloss. II, 3), quomodo idem Salvator de die et hora futuri judicii dicit se nescire (Marc. XIII, 32)? Si autem sciat, et dicit se nescire, videtur mentiri.

Dictum hoc duplicem continet sensum. In Christo enim omnes thesauros sapientiae et scientiae sic dicit absconditos, ut qui habet Christum, pro omni sapientia et scientia illi cedat : ut scire Christum totum sit scire, et omnem sapientiam comprehendisse, sicut dicitur ad Colossenses, Nemo vos circumveniat per philosophiam et inanem seductionem, secundum elementa hujus mundi, et non secundum Christum: quia in Christo inhabitat omnis plenitudo divinitatis corporaliter: Hoc est, nihil indigere ad salutem, eum qui credit in Christum, sed illi hoc abundare; quia plenitudo divinitatis in fide ejus est. Et iterum in eadem Epistola inter caetera ait: Nemo vos seducat in humiliationem cordis, et in superstitione Angelorum, quae videt extollens se, frustra inflatus mente carnis suae, et non tenens caput ex quo omne corpus subministratum et productum crescit in incrementum Dei (Coloss. II, 8, 9, 18, 19). Si itaque credentes in Christum, caput totius principatus et potestatis venerantur, nullius indigent, sed totum quod ad salutem opus est habent; nihil illis oberit inferiora quae ad salutem nihil conferunt nescire, quando id quod necessarium est norunt. Hujusmodi ergo totum scire, dicendi sunt, qui hoc sciunt, quod illis proficiat ad salutem. Est etiam illud, quia in Salvatore omnes thesauri sapientiae et scientiae sunt absconditi. Omnia enim sacramenta Paterna ipsi sunt cognita; et omnem creaturam ipse metitur; et nec Pater judicat quemquam, sed omne judicium dedit Filio (Joan. V, 22); et nemo scit quae sunt in Deo, nisi Spiritus Dei (I Cor. II, 11), qui est et Christi. Quomodo ergo et diem et horam futuri judicii nescire dicendus est, cujus Spiritus quae in Deo sunt, novit, de quo dixit quia de ejus accepit (Joan. XVI, 14, 15)? Si ergo qui de ejus accepit novit quae futura sunt, quomodo non sciet Christus qui misit Spiritum sanctum? Et potest fieri ut judex nesciat diem futuri judicii? quippe cum omnia signa dederit quando speretur. Forte etiam hos dicatur vere nescire, quibus dicit: Amen dico vobis, quod nescio vos (Matth. XXV, 12). Nec virgines stultas et improvidas dicetur scire, quia dixit etiam, ipsis dicentibus, Domine, Domine, aperi nobis, Amen dico vobis, quod nescio vos. Causa ergo est ut dicat se nescire quod scit. Denique sic ait: Vigilate, quia nescitis qua hora Dominus vester venturus sit (Id. XXIV, 42). Ut ergo sollicitos nos et vigilantes faceret, interrogatus nescire se dixit diem et horam futuri judicii; sed ut nobis prodesset, negavit se scire quod scit. Ignorantibus ergo nobis quid prosit nobis, scire omnino volumus quod si scierimus, oberit nobis: Christus autem provisor salutis nostrae, ne audiremus quod contra nos esset, dixit se nescire. Numquid si alicui in dolore posito gladium poscenti se ut perimat, qui habet respondeat se non habere, mendacii arguendus erit negans, quod si non neget, sciat contrarium?