|
Quod Jacob ascensurus Bethel, ubi
jussus est aram facere, dicit domui suae et omnibus qui cum illo
erant, Tollite deos alienos, qui vobiscum sunt, de medio vestrum,
etc.; deinde dicitur, Et dederunt Jacob deos alienos, qui erant in
manibus eorum, et inaures quae erant in auribus eorum: quaeritur quare
et inaures, quae si ornamenta erant, ad idololatriam non pertinebant,
nisi quia intelligendum est phylacteria fuisse deorum alienorum. Nam
Rebeccam a servo Abrahae inaures accepisse Scriptura testatur; quod
non fieret, si eis inaures habere ornamenti gratia non liceret. Ergo
illae inaures quae cum idolis datae sunt, ut dictum est, idolorum
phylacteria fuerunt.
|
|
