|
Hi filii Liae, quos peperit ipsi
Jacob in Mesopotamia Syriae, et Dinam filiam ejus, omnes animae
filii et filiae ejus triginta tres. Numquid istae omnes triginta tres
animae ex Lia in Mesopotamia Syriae natae sunt? Sex utique filii et
una filia, ex quibus nepotes commemorati sunt. Si ergo de uno
Benjamin quaestio nata fuerat, quando numeratis duodecim filiis Jacob
et nominatim commemoratis dictum est, Hi filii Jacob qui facti sunt
ei in Mesopotamia Syriae (Supra, quaest. 117]): quanto major
nunc quaestio est, quomodo triginta tres animae ex Lia in Mesopotamia
Syriae natae sunt; nisi quia illa locutio confirmatur, tanquam ibi
omnes orti sunt, quorum parentes ibi orti sunt? Deinde et illud jam
non dubium est, in una filia filias nominari, plurali numero pro
singulari posito.
|
|
