|
Viros vero qui erant ad ostium
domus percusserunt caecitate. Graeci habent, AORASIA, quod
magis significat, si dici posset, avidentia, quae faciat non videri,
non omnia, sed quod non opus est. Nam merito movet quomodo potuerunt
deficere quaerendo ostium, si tali erant caecitate percussi, ut omnino
nihil viderent. Hoc enim modo sua calamitate turbati, ulterius ostium
non requirerent. Hac AORASIA et illi percussi sunt, qui
quaerebant Elisaeum (IV Reg. VI, 18). Hanc et illi
habuerunt, qui Dominum post resurrectionem cum illo ambulantes in via
non cognoverunt (Luc. XXIV, 16); quamvis ibi non sit hoc
verbum positum, sed res ipsa intelligatur.
|
|
