|
Quod latini habent, nato filio
Liae de Zelfa, quod dixerit, Beata vel Felix facta sum, graeci
habent, EYTYKE, quod magis bonam fortunam significat. Unde
videtur occasio non bene intelligentibus dari, tanquam illi homines
fortunam coluerint, aut hoc verbum divinarum Scripturarum auctoritas
in usu receperit. Sed aut fortuna intelligenda est pro his rebus quae
fortuito videntur accidere, non quia numen aliquod sit, cum haec ipsa
tamen quae fortuita videntur, causis occultis divinitus dentur; unde
etiam verba, quae nemo potest auferre a consuetudine loquendi, parata
sunt, id est, forte, et fortasse, et forsitan, et fortuito; unde
videtur et in graeca lingua resonare, quod dicunt TAKA, velut ab
eo quod est TYKE: aut certe Lia propterea sic locuta est, quod
adhuc gentilitatis consuetudinem retinebat. Non enim hoc Jacob
dixit, ut ex hoc data huic verbo putetur auctoritas.
|
|
