|
Et immolaverunt hostiam
salutaris Deo. Non dixit, hostiam salutarem, sed, hostiam
salutaris; quod graecus habet SOTERIOY. Unde in Psalmo,
Calicem, inquit, salutaris accipiam (Psal. CXV, 13): non
dixit, calicem salutarem. Ubi videndum est, ne forte ille
significetur, de quo dixit Simeon, Quoniam viderunt oculi mei
salutare tuum (Luc. II, 30). Hunc enim et Psalmus commendat
ubi legitur, Bene nuntiate diem ex die salutare ejus (Psal.
XCV, 2). Quid est enim aliud, si diligentius attendamus, quod
ait diem ex die, nisi lumen ex lumine, hoc est Deum ex Deo, quod
est unigenitus Filius?
|
|
