|
Et sine parabolis non loquebatur eis. Non quia nihil proprie locutus
est, sed quia nullum fere sermonem explicavit, ubi non aliquid per
parabolam significavit, quamvis in eo aliqua et proprie dixerit: ita
ut saepe inveniatur totus sermo ejus parabolis explicatus, totus autem
proprie dictus nullus inveniatur. Explicatos autem sermones dico,
quando ex aliqua occasione rerum incipit loqui quousque terminet
quidquid ad ipsam rem pertinet, et transeat ad aliud. Nonnunquam sane
alius evangelista contexit, quod alius diversis temporibus dictum
indicat. Non enim omnimodo secundum rerum gestarum ordinem, sed
secundum suae quisque recordationis facultatem, narrationem quam
exorsus est ordinavit.
|
|
