|
Hoc opusculum circumferebatur etiam inter Bernardi opera, inscriptum
Scala claustralium, sive Tractatus de modo orandi; sed nec illius
esse Lovanienses censuerunt, et bene quidem. In codice enim Ms.
Carthusiae Coloniensis (sicuti in ultima editione Bernardi notatum
est) praefixam habet epistolam cum ista epigraphe: Epistola domini
Guigonis Carthusiensis ad fratrem Gervasium de Vita contemplativa.
Dilecto fratri suo Gervasio Fr. Guigo, delectari in Domino.
Amare te ex debito teneor, quia prior me amare incoepisti; et
rescribere tibi compellor, quia litteris tuis ad scribendum me prius
invitasti. Quaedam ergo quae de spirituali exercitio claustralium
excogitaveram, transmittere proposui; ut qui talia experiendo melius,
quam ego tractando, didicisti, mearum judex sis cogitationum et
corrector. Et merito haec nostri laboris initia tibi primitus offero,
ut novellae plantationis primitivos fructus colligas; quoniam de
servitute Pharaonis, te delicata solitudine laudabili furto
surripiens, in ordinata castrorum acie collocasti, ramum de oleastro
artificiose excisum prudenter inserens in oliva. Tum liber incipit:
Cum die quadam, etc. Post extrema autem verba illa, pacem in
idipsum, sic liber clauditur: Tu ergo frater, mi Gervasi, si
quando datum tibi fuerit desuper praedictorum graduum celsitudinem
conscendere, memento mei; et ora pro me, cum bene fuerit tibi; ut
sic cortina cortinam trahat, et qui audit, dicat, Veni.
|
|
