|
Non enim indignum tibi videtur cum te formam vocamus. Nam tua
essentia, et species dici potest et forma (non frustra tam
speciosissimum quam formosissimum in laude tua ponitur); sed forma
quae materia caret et motu, tempore et loco, atque ideo unum est, et
est id quod est; reliqua vero non sunt id quod sunt. Haec verissime
sola dicere potest, Ego sum qui sum (Exod. III, 14). Haec
tanta ac talis est, ut de ejus pulchritudinis visione nihil in hac vita
sibi usurpare mens humana audeat, quod solum electis tuis praemium in
subsequenti remuneratione reservas.
|
|
