|
Abdias quartus in ordine prophetarum, sermone simplex et sensu
multiplex; rarus in verbis, sed copiosus in sententiis. Juxta illud
Salomonis: Sapiens verbis innotescit paucis (Eccle. XX), prophetiam suam
litteraliter adversus Idumaeam dirigit; allegorice contra mundum,
tropologice contra carnem stylum suum acuit; Salvatoris typum gerens,
ipsius adventum subtiliter introducit, per quem mundus destruitur, per
quem caro atteritur, per quem libertas redditur. Hinc est illud: Si
Filius vos liberaverit vere liberi eritis (Joan. VIII). Hic est Abdias,
qui sub Achab rege centum prophetas in specubus latentes pavit: et dum
corporalem ministrat alimoniam, spiritualem divinitus accepit.
Prophetavit autem praefatus vir quando et alii prophetae, Amos scilicet,
Joel et Osee. Jacetque conditus in Samaria cum Elisaeo et Joanne
Baptista.
|
|
