TITULUS 46

Septima petitio est contra luxuriam, qua dicitur: Libera nos a malo. Nam licet, ut alibi diximus, multiplex est malum, ut malum corporis et malum animae; malum quod est culpa, malum quod est poena; malum hujus saeculi, et malum futuri; tamen praecipuum malum potest quodammodo censeri luxuria, quae hominem illecebris captum in servitutem redigit. Unde per donum sapientiae liberari petimus dicentes: Libera nos a malo. Amen.