|
Aquae superiores significant bonos salvandos; aquae inferiores, malos
damnandos. De aquis superioribus dictum est: Benedicite, aquae, quae
super coelos sunt, Domino (Dan. III). Quia electi in perpetuum non
cessabunt laudare nomen Domini. De aquis inferioribus scriptum est:
Congregentur aquae in locum unum, quia reprobi per totum mundum modo
dispersi congregabuntur in infernum, in sempiternum puniendi. Quae sunt
tamen istae aquae? Immundi, fornicatores, concubinarii, incestuosi,
adulteri, avari, fures, rapaces, ebriosi, perjuri, homicidae, invidi,
iracundi, odio perciti (I Cor. V), et qui mulierem viderunt ad
concupiscendum eam, et qui dicunt fratri suo, fatue (Matth. V): et
quicunque a Deo sunt separati, nec per gratiam ipsius justificati, ut
Pagani, Judaei, falsi Christiani. Isti congregabuntur in locum unum, id
est, in infernum: qui est locus in tenebris, ubi non exstinguitur ignis.
|
|
