|
Prope erat Pascha Judaeorum, et ascendit Jesus Jerosolymam, et invenit
in templo ementes et vendentes boves, et oves, et nummularios sedentes.
Et cum fecisset quasi flagellum de funiculis, omnes ejecit de templo,
oves quoque, et boves; et nummulariorum effudit aes, et mensas
subvertit, et iis, qui columbas vendebant, dixit: Auferte istas hinc, et
nolite facere domum Patris mei, domum negotiationis (Joan. II). Pascha
agimus, dum a vitiis ad virtutes transimus. Ad hoc Jesus venit, dum
Ecclesiam quotidie visitat, et actus cujusque considerat, et eos ejicit,
qui inter sanctos vel ficte bona, vel aperte mala faciunt. Per boves qui
arant, praedicatores coelestis doctrinae significantur. Hos vendunt, qui
non amore Dei, sed pro quaestu temporali praedicant. Oves innocentes,
sua vellera vestiendis praebent, per has significantur opera pietatis et
munditiae. Quae venduntur, dum pro humana laude geruntur. Spiritus
sanctus in columba apparuit; unde per columbam accipitur Spiritus
sanctus, quem vendunt Simoniaci. Nummos mutuo dant in Ecclesia, qui non
simulate coelestibus, sed aperte terrenis serviunt. Hi omnes ejiciuntur
de parte sortis sanctorum, qui vel ficte bona, vel aperte mala faciunt.
Et funiculus peccatorum modo flagellat ad correctionem, quibus
incorrecti in fine ligabuntur. Oves quoque et boves ejicit, quia talium
vitam, et doctrinam ostendit reprobam. Aes et mensas subvertit, quia et
in fine ipsae res, quas dilexerant, destruentur.
|
|
