|
Factum est autem, dum per ambularet Jesus per sata: discipuli ejus
coeperunt progredi, et vellere spicas (Matth. XII). Discipuli per sata
transeunt: dum praelati subditos pia sollicitudine circumspiciunt, et
qualiter quemque ad regnum coelorum pertrahant, sedulo perpendunt; et
dum eos ad beatitudinem trahere concupiscunt, quasi salutem eorum
esuriunt: spicas vellunt, cum mentes audientium, per praedicationem ab
amore temporalium dividunt. Spicas fricant cum eos paleis vitae veteris
exspoliant: grana manducant, dum eos superfluitate, et asperitate
purgatos veritati sanctae Ecclesiae sociant, et eidem incorporant. Et
hoc Sabbato faciunt: quia a terrenis actibus quiescentes, et Deo
vacantes, requiem coelestem et operando quaerunt, et praedicando
promittunt: Aliter. Per sata ambulant, quia sacra eloquia investigant.
Esuriunt, dum in eis sententias meliores discere concupiscunt. Spicas
vellunt, dum ea in Scripturis, quae sibi utiliora videntur, colligunt.
Collectas fricant: dum sub paleis litterae requirunt grana spiritualis
intelligentiae. Grana vero manducant; dum per spiritualem
intelligentiam, virtutes, et opera roborant. Et hoc Sabbato faciunt;
quia vacant, ut videant: quoniam Dominus ipse est Deus. Hoc Dominus
sabbati probat, sed stulti defensores Sabbati reprobant; quia solam
superficiem litterae diligunt: mentis refectionem nesciunt, requiem
animarum non norunt.
|
|
