|
Nemo potest vasa fortis ingressus domum ejus diripere, nisi prius fortem
alliget (Matth. XII). Fortis, est diabolus; fortior superveniens,
Christus; domus fortis, mundus vasa, homines; fortis alligatio, diaboli
refrenatio, ne tentet nos ultra vires nostras. Direptio vasorum,
conversio hominum ad fidem venientium. Fortior fortem, domum ejus
intrans, alligavit, et vasa illius diripuit; cum Christus per carnem in
mundum veniens, et diabolum a sententia tentationum cohibens, homines a
diabolo possessos ad fidem suam convertit.
|
|
