|
Simile est regnum coelorum sagenae missae in mare, et ex omni genere
piscium congreganti, quam cum impleta esset, educentes, et secus littus
sedentes elegerunt bonos in vasa sua, malos autem foras miserunt (Matth.
XIII). Sagena ista, praedicatio est evangelica, quae in mare, id est in
fluctuationem et amaritudinem praesentis saeculi demissa congregat
multitudinem piscium, id est ex omni genere hominum, trahit ad littus
maris, id est ad finem praesentis saeculi. Impletio sagenae consummatio
praedicationis evangelicae. Congregat ex omni genere hominum, quia ex
Judaeis, quibus praedicavit Christus; et ex Romanis, quibus
praedicaverunt Petrus et Paulus; et ex Indis, quibus Thomas; ex Persis,
quibus praedicaverunt Simon et Judas; et ex hominibus minoris Indiae,
quibus Bartholomaeus; ex Syriis quibus Philippus; ex Asianis, quibus
praedicavit Joannes; ex Achaicis, quibus Andreas; ex Aethiopibus, quibus
Matthaeus; et ex Alexandrinis, quibus Marcus, et sic ex aliis
nationibus, ad quas sive per apostolos, sive per apostolorum discipulos
et successores, pervenit sonus praedicationis. In omnem enim terram
exivit sonus eorum (Psal. XVIII). In eo namque quod praedicatio
Evangelica ex omnibus nationibus assumit: ex omni genere piscium trahit.
Aliter. Congregat ex omni genere piscium, quia congregat ex omni genere
peccatorum. Congregat immundos peccatores, fornicatores, adulteros,
incestuosos feneratores, et ex omnibus aliis qui minoribus vel majoribus
peccatis sunt a Deo divisi et per multas iniquitates dispersi. Et ex
omnibus cungregat et congregatos justificat; et neminem expellit, qui,
ipsa audita, eam intrare voluerit. Continet autem sagena ista pisces
multos ut diversos bonos et malos; sed interim dum sagena ad littus
trahitur, isti in illos frequenter commutantur. Boni etenim nonnunquam
mali fiunt per culpam, et mali aliquando boni fiunt per gratiam, et
nondum potest judicari, qui in vasa sint eligendi, qui foras
projiciendi, cum ad littus, id est ad finem saeculi ventum fuerit; tunc
judicium verum secernendorum bonorum et malorum patebit, quia angeli
eligent bonos in vasa, id est in aeterna tabernacula, et malos foras
mittent in aeterna tormenta. Omnes autem, qui fidem Christianam
recepturi non sunt, extra sagenam istam sunt, sicut Judaei et pagani. Et
tales jam judicati sunt, non solum judicio secundum praescientiam, et
judicio secundum causam, sed etiam judicio secundum operationem,
deinceps judicandi judicio secundum retributionem. Est autem judicium
secundum praescientiam, quo judicati sumus antequam essemus. Judicium
secundum causam, quo judicamur ex quo boni et mali sumus. Judicium
secundum operationem, quo judicamur per manifestam actionem esse boni et
mali qui prius secundum causam eramus occulti. Judicium secundum
retributionem est, quo recipimus in premio secundum quod fuimus et
fecimus in merito. Ex his quatuor judiciis, duo sunt occulta, duo
manifesta. Occulta, judicium secundum praescientiam et judicium secundum
causam. Manifesta, judicium secundum retributionem et judicium secundum
operationem. Duo quoque pertinent ad Deum: judicium videlicet secundum
praescientiam et judicium secundum retributionem. Duo ad hominem:
judicium secundum causam et judicium secundum operationem. Sed qui fidem
Christianam prorsus respuunt, jam tribus praecedentibus judiciis,
videlicet judicio secundum praescientiam, judicio secundum causam et
judicio secundum operationem sunt judicati; judicio autem secundum
retributionem judicandi.
|
|
