|
Secessit Jesus in partes Tyri et Sidonis. Et ecce mulier Chananaea a
finibus illis egressa, clamabat dicens: Miserere mei, Domine, fili David
(Matth. XV). Mulier gentilis, sed fide ad Dominum veniens, gentium
designat Ecclesiam; quae rogat pro filia daemoniaca, id est pro gente
sua nondum salvata, ut diaboli fraudibus absoluta, verae divinitati
serviat liberata. Fines Tyri, et Sidonis, in quibus mulier Dominum
rogat, duorum populorum Judaeorum et gentium ad Christum conversorum,
fidem unanimem designant. Sed mulier ista secundum Matthaeum bene de
finibus Tyri egressa, secundum Marcum domum ingressa, ad Deum atque ad
pedes ejus procidisse dicitur ut ex utroque colligatur; quod soli
fideliter et recte pro errantibus orant, qui priscas perfidiae suae
mansiones relinquunt, et in domum Domini, id est in Ecclesiam humili ac
pia sese devotione transferunt. Non est bonum sumere panem filiorum, et
mittere canibus. Mensa, est Scriptura: panis, scientia; filii, Judaei;
canes, gentiles: quasi diceret: Non est bonum, ut beneficium miraculorum
quod convenit populo Judaeorum, qui habent cognitionem Dei impendatur
filiae tuae gentili, quae non habet notitiam Dei, sed mulier gentilis:
per responsum humilitatis meruit filiae suae beneficium sanitatis.
|
|
