|
Sicut factum est in diebus Noe, ita erit in die Filii hominis: Edebant,
et bibebant, uxores ducebant, et dabantur ad nuptias usque in diem, qua
intravit Noe in arcam; et venit diluvium, et perdidit omnes (Matth.
XXIV; Luc. XVII). Noe arcam aedificat, cum Dominus fideles in Ecclesiam
congregat, quam consummatam ingredietur cum hanc in die judicii
praesentia sua illustrabit. Sed dum aedificatur arca, iniqui
luxuriantur; et dum intratur, aeterna damnatione plectuntur. Similiter
factum est in diebus Lot: Edebant et bibebant, emebant et vendebant,
plantabant et aedificabant. Qua die autem exiit Lot e Sodomis, pluit
Deus ignem, et sulphur de coelo, et perdidit omnes. Lot, qui
interpretatur declinans, est populus electorum, qui dum in Sodomis, id
est inter reprobos, ut advena, moratur, quantum valet scelera eorum
declinat. Exeunte Lot Sodoma periit, quia in consummatione saeculi
exibunt angeli, et separabunt malos de medio justorum, et mittent eos in
caminum ignis (Matth. XIII).
|
|
