|
Cum sero esset, erat navis in medio maris, et Jesus solus in terra
(Marc. VI). Sero significat vitae praesentis ignorantiam; navis sanctam
Ecclesiam; mare, hujus saeculi inconstantiam; terra, soliditatem
supernam; quarta vigilia, quatuor Evangeliorum scientiam; labor
discipulorum in remigando, laborem justorum in bene operando; ventus,
est diabolus; contrarietas venti, tentationes diaboli. Jesus autem supra
mare ambulat, cum saeculi praesentis tumorem calcat, deprimit et
humiliat. Et labores discipulorum respicit, cum multiplices
tribulationes justorum in medio misericorditer attendit. Et volebat
praeterire eos, ut scilicet ad horam turbati, sed continuo post
liberati, plus liberationis suae miraculum stuperent, et liberatori suo
majorem gratiam referrent, sicut saepe videtur divina pietas fideles in
tribulatione et tentatione deserere. Unde scriptum est: Quare me
repulisti? quare tristis incedo, dum affligit me inimicus? (Psal. XLII.)
Sed continuo adest Dominus, et dicit: Confidite: ego sum, nolite timere.
De hac consolatione dictum est: Cum transieris per aquam, tecum ero, et
flumina non operient te (Isa. XLIII). In navim ad illos ascendit, quando
sanctam Ecclesiam per gratiam intrans, fideles contra quaelibet adversa
munit.
|
|
