|
Legimus in Evangelio (Marc. VIII et Matth. XV), quod Dominus quatuor
millia hominum de septem panibus et paucis pisciculis satiavit. In quo
loco per septem panes septem dona Spiritus sancti figurantur; per
pisciculos vero, exempla Patrum antiquorum, qui sub naturali lege vel
scripta fuerunt, designantur. Comedentes quatuor millia fuisse
describuntur, propter quatuor Evangeliorum perfectionem; vel propter
quatuor cardinalium virtutum exercitationem. Dominus ergo satiat quatuor
millia hominum ex septem panibus, et paucis pisciculis quando per
septiformis spiritus dona, et per praecedentium patrum exempla, qui de
fluctibus hujus saeculi erepti, et divina benedictione consecrati;
refectionem nobis, ne in hujus saeculi cursu deficiamus, praebent.
Quatuor, inquam, millia hominum satiat, quando electos credulitate
quatuor Evangeliorum comprehensos, quatuor principalibus virtutibus
exercitatos, donis spiritualibus et exemplis patrum perficit, docet et
justificat. Et notandum quod dicuntur pisciculi pauci, quia valde rari
fuerunt justi antiqui. Triduo autem Dominum sustinent, quia in fide
sanctae Trinitatis constituti, spiritualem a Deo desiderant pastum
accipere. Quidam ex eis de longe venerunt. Qui enim nihil carnalis
expertus corruptionis ad servitium Domini festinat, de longinquo non
venit. Qui etiam nulla impudicitia, nullis flagitiis inquinatus, solum
autem conjugium expertus est, non venit de longinquo. Qui vero multis et
magnis flagitiis semetipsos polluunt, et post hoc ad Deum redeunt, de
longinquo veniunt. Et si dimisero eos jejunos deficient in via. Conversi
namque peccatores in praesentis vitae via deficiunt; si in sua
conscientia sine pabulo doctrinae dimittantur. Septem sportae de
fragmentis impletae, spirituales viri sunt, qui sublimiora, quae
capacitatem minorum superant, et colligunt et custodiunt. Et dimisit
eos. Dominus refectos dimittit, cum spirituali doctrina eruditos, ut
cognita perficiant; in proprio et libero arbitrio derelinquit, nec
aliquem eorum ad serviendum sibi cogit.
|
|
