|
Cum vadis cum adversario tuo ad principem in via: da operam liberari ab
ipso, ne forte trahat te ad judicem, et judex tradat te exactori, et
exactor mittat te in carcerem (Luc. XII). Adversarius noster in via Dei
sermo est, contrarius carnalibus desideriis in praesenti vita, a quo
liberatur qui praeceptis ejus humiliter subditur. Alioquin ex sermone
contemptu reus in examine judicis tenebitur peccator. Quem judex
exactori, id est, diabolo tradet, quia permittet ut Diabolus animam ejus
ad poenam trahat et ipse exactor eam retrudet in gehennam. Dico tibi,
non exies inde, id est nunquam: donec etiam novissimum quadrantem reddas
(Matth. V; Luc. XII), id est pro minimis peccatis puniaris, et reddas
semper poenas pro peccatis patiendo nunquam veniam consequendo.
|
|
