|
Cum invitatus fueris ad nuptias, non recumbas in primo loco (Luc. XIV).
Nuptiae significant conjunctionem Christi et Ecclesiae. Honoratiori post
invitato locum dat, qui de longae conversationis suae confidentia
securior factus, vita illorum, qui se in Christo secuti sunt, agilitate
praeitur. Et cum rubore novissimum locum tenet, cum de aliis meliora
cognoscens, quidquid de sua operatione altum senserat, humiliat. Recumbe
ergo in novissimo loco, id est quanto major es, tantum te humilia in
omnibus (Eccli. III). Ut dicat tibi qui te invitavit: Amice, ascende
superius, quia Deus dat humilibus gratiam (Jac. IV), quam aufert
superbis. Tunc erit tibi gloria coram simul discumbentibus, id est in
eadem fide, vel eadem beatitudine quiescentibus.
|
|
