|
Nemo commissuram a vestimento novo immittit in vestimentum vetus,
alioquin et novum rumpit, et veteri non convenit commissura a novo (Luc.
V). Novum vestimentum, opus bonum est, vetus vestimentum, peccatum.
Quicunque autem quodlibet opus bonum et peccatum, in quo manet,
conjungit; hoc quod facit amittit, et major scissura fit quia melius
erat ei non cognovisse viam justitiae, quam post agnitam retrorsum
converti ab eo quod traditum illi erat sancto mandato (II Petr. II). Et
nemo mittit vinum novum in utres veteres; alioquin rumpit vinum novum
utres, et ipsum effundetur, et utres peribunt. Sed vinum novum in utres
novos mittendum est: et utraque conservantur. Utres veteres sunt homines
peccatores, veterem hominem cum actibus suis imitantes. Utres novi sunt
homines per gratiam innovati, novi hominis imitatores, qui secundum Deum
creatus est, id est Christi. Vetus vinum, culpa; novum vinum, gratia.
Quandoque ergo vinum novum in utres veteres ponitur, et utres rumpuntur,
et vinum effunditur: quia qui gratiam Dei accipiunt, et post acceptam
gratiam sicut prius peccato deservire volunt et ipsi pro contemptu
gratiae deteriores, quam prius erant, efficiuntur - et gratia eis
aufertur. Aliter: Nemo mittit novum vinum in utres veteres, id est Deus
gratiam non tribuit peccatoribus nisi prius a vetustate renoventur.
Alioquin vinum rumpit utres, et ipsum effunditur, id est, si ipsi
peccatores sacramenta, in quibus gratia continetur et confertur,
accipere praesumpserint: et ipsi de praesumptione deteriores
efficiuntur, et gratia eis minime adesse permittitur: Sed vinum novum in
utres novos mittendum est, et sic utraque conservantur: quia dum bono
homini gratia tribuitur et ipsam acceptam gratiam conservat et gratia
conservata eum justificat. Et nemo bibens vetus statim vult novum; dicit
enim: Vetus melius est. Nemini enim quandiu delectatur in culpa, placet
gratia. Sed postquam vinum novum, id est jucunditatem gratiae, bene
gustaverit, veteri novum, id est culpae gratiam anteponit, quam largitur
immutabiliter et summe bonus Deus.
|
|
