|
Quis ex vobis homo, qui habet centum oves: et si perdiderit unam ex
illis, nonne dimittit nonaginta novem in deserto, et vadit ad illam quae
perierat, donec inveniat eam? etc. (Luc. XV.) Homo iste est Deus; oves,
creaturae rationales; nonaginta novem oves, novem angelorum ordines;
ovis centesima, humana natura; ovis centesimae requisitio, divina
incarnatio; ovis relatio, humana redemptio; amici et vicini, angeli;
amicorum et vicinorum de inventione ovis congratulatio, angelorum de
humana salute exsultatio. Quae mulier habens drachmas decem, etc.
Mulier, divina sapientia; decem drachmae, novem ordines angelorum, cum
adjunctione humanae naturae. Mulier enim decem drachmas habuit, cum Deus
homines et angelos ad imaginem suam creavit. Sed unam perdidit, cum homo
a similitudine Creatoris recessit. Sed sapientia lucernam ad quaerendum
accendit, cum in carne apparuit, quia lucerna lux est in testa, id est
Verbum in carne: quae ubi inter homines claruit, domum evertit, quia
conscientias hominum consideratione reatus sui perturbavit. Et sic
drachma reperitur dum in homine similitudo Conditoris reparatur.
|
|
