|
Factum est dum iret Jesus in Hierusalem, transibat per mediam Galilaeam
et Samariam. Et cum ingrederetur quoddam castellum, occurrerunt ei decem
viri leprosi (Luc. XVII). Decem leprosi significant eos, qui contra
praecepta Decalogi vivunt, et diversis, et damnabilibus peccatis male
agendo semetipsos polluunt. Tales veniunt ad Jesum per fidem, ex quo
ipse ingressus est castellum hujus mundi per incarnationem, et stant a
longe per humilitatem, et exclamant per cordis poenitentiam: Jesus
praeceptor, miserere nostri. Qui dum vadunt, ut ostendant se
sacerdotibus per vocis confessionem, sanantur a lepra transactae
iniquitatis, sicut scriptum est: Dixi: Confitebor adversum me
injustitiam meam Domino: et tu remisisti impietatem peccati mei (Psal.
XXXI). Novem qui ad agendas gratias accepta sanitate regredi
neglexerunt, illos exprimunt qui, post acceptam remissionem criminum,
Decalogum complendo, grates pro gratia reddere contemnunt. Unus qui
rediit et gratias egit, universalis Ecclesiae unitatem designat, quae
pro beneficio gratiae grates referre non cessat.
|
|
