CAP. V. De arbore et ejus fructu.

Non est arbor bona, quae facit fructus malos; neque arbor mala faciens bonos fructus (Luc. VI). Arbor, est anima; arbor bona, anima justa; arbor mala, anima prava; fructus, opus; fructus justi, justitia; fructus impii, culpa; cognitio arboris ex fructu, cognitio hominis ex actu; succisio malae arboris, damnatio peccatoris; securis, Christus; manubrium, humanitas; ferrum, divinitas; acumen securis, judicium divinae potestatis.