|
Erat quidam de archisynagogis nomine Jairus: et videns Jesum procidit ad
pedes ejus, et deprecabatur eum, dicens: Quoniam filia mea in extremis
est, veni, impone manum super eam, ut sana sit et vivat (Luc. VIII).
Jairus interpretatur illuminatus et significat Judaicum populum in
antiquis patribus, prophetis, Moyse. Samuele, David et aliis
illuminatum. Archisynagogi filia est Synagoga legali institutione
disposita, quasi unica Moysi nata. Haec duodecimo anno, id est tempore
pubertatis appropinquante, quando spiritualem prolem Deo generare
debuit, moriebatur, subito languore consternata. Sed, pergente Domino ad
filiam archisynagogi, morbosa mulier patiens fluxum sanguinis praeripit
salutem, quia sic dispensata est salus humani generis, ut primo aliqui
ex Israel, deinde plenitudo gentium intraret, et sic omnis Israel salvus
fieret (Rom. XI). Mulier ergo sanguinaria a Deo curata Ecclesia est de
gentibus ingenti carnalium delectationum fluxu polluta, et a coetu
fidelium segregata: haec cum Christus Judaeam salvare decerneret, ad jam
paratam aliis salutem spe certa praevenit, et multa expenderat in
medicis, id est in theologis, prophetis, legum saecularium doctoribus,
qui se utilia vivendi praecepta dare promittebant. Daemones quoque,
quasi hominibus consulendo, se ut deos colendos dicebant. Quibus
audiendis quanto magis naturalis industriae vires expendebant, tanto
minus sanari poterant. Sed cum audissent Judaicum populum aegrotare, et
verum medicum de coelo venisse, coeperunt languoris sui et sperare et
inquirere remedium.
Et notandum quod puella duodenis fuit, et mulier annis duodecim
sanguinis fluxum passa est, id est quando haec nata fuit, illa infirmari
coepit: una enim, eademque saeculi aetate et Synagoga in patriarchis
nasci, et gentes foedari idolalatria coeperunt. Unde retro in turba
accessit, et tetigit vestimenta ejus, et confestim cessavit fluxus
sanguinis ejus. Gentium Ecclesia venit retro, quia Deum in carne non
vidit praesentem; sed post ad fidei et ad agnitionis gratiam pervenit,
et tactu vestimentorum, id est participatione sacramentorum ejus, meruit
sanari a peccatis. Fluxus quippe sanguinis (Matth. IX), originem
peccati, et primordium immundae cogitationis significat, ex quo omne
peccatum nascitur. Sed Dominus non solum opera, sed et verba mala, et
cogitationes pravas, sacramentis evangelicis quasi suis vestimentis a
fonte obscenitatis emundat. Quod turba dicitur quidem opprimere et una
sanata est, significat quod multi sunt vocati, pauci electi (Matth.
XXII). Muliere sanata nuntiatur puella mortua, quia Ecclesia gentium
labe vitiorum exuta, continuo Synagoga est perfidiae invidiaeque letho
resoluta: perfidiae quidem, quia in Christum credere noluit; invidiae
vero, quia Ecclesiam credere doluit. Resuscitabitur puella, cum postquam
plenitudo gentium intraverit, omnis Israel salvus fiet. Dominus, dum
suscitaret puellam paucis retentis, alios ejecit, quia infidelibus non
sunt revelanda mysteria divina, nec irrisoribus miracula divina.
Secundum moralem sensum, Dominus quotidie mulierem sanat, cum animam
diversis vitiis corruptam per gratiam curat. Turba quoque ejicitur, ut
puella suscitetur; quia, nisi saecularium curarum multitudo ejiciatur a
corde, anima intus jacens mortua non suscitatur. Dum enim sese per
multas cogitationes spargit, ad considerationem salutis nullatenus se
colligit.
|
|
